TILA patutsada sa tri-committee ng Kamara ang post ng vlogger na si Mocha sa gitna ng mga pagdinig kaugnay ng fake news na ikinakalat sa social media.

Sa kanyang Facebook Page na Mocha Uson Blog, nag-post ang dating assistant secretary of the Presidential Communications Operations Office (PCOO) ng nakaraang administrasyong Duterte ng: “R.I.P. Freedom of Expression”.

Agad naman itong sinopla ng mga netizen. Paalala ng isa: “I feel sorry for what you had become. Freedom of expression doesn’t mean you can sponsor lies”.

Nabatid na mino-monitor na ng tri-committee ang mga post ng vloggers na nagpakita sa fake news hearing noong Biyernes kasunod ng babala sa mga ito na ipako-contempt at ipakukulong sa Kongreso kapag binanatan nila ang komite.

Babala ni House committee on public accounts chairman Joseph Stephen Paduano, sinoman ang babanat muli sa tri-comm ay hindi sila mangingiming ipa-contempt ang mga ito.

“Just to remind you – Section 11 of our internal rules, Paragraph F – we will not allow discussions or attacking, insulting this committee hearing after the suspension of this hearing because you will be in violation… we will be forced to cite you in contempt (undue interference),” ani Paduano.

Kabilang sa mga kilalang vlogger at social media personalities na dumalo sa pagdinig sina dating Press Secretary Trixie Cruz-Angeles, Krizette Laureta Chu, Ahmed Paglinawan, Elizabeth Joie Cruz, Ethel Pineda Garcia, Mark Anthony Lopez, Mary Jane Quiambao Reyes, Marc Louie Gamboa at Richard Tesoro Mata.

Binalaan din ng mambabatas ang mga vlogger na hindi dumalo sa nakaraang pagdinig na ipako-contempt kapag hindi dumalo sa Abril 8.

Kabilang sa mga ito sina Lorraine Marie Tablang Badoy-Partosa, Jeffrey Almendras Çeliz at Allan Troy “Sass” Rogando Sasot at iba pa.

(PRIMITIVO MAKILING)